تـحـيـة ايهاب الامين

من طرف اللورد الخميس يونيو 25, 2009 1:02 am

بين الريدة وطيبة الخاطر
ليك كلماتي بسوقا هدية
أحاول وصفك لو كان أقدر
إنت صفاتك ما عادية
إنت البحر الشقّ طريقو
وشال عوامو ودفع الدية

* * *

شُفت ورود في الساحة بترقص
شُفت نجوم طلعت صبحية
وكل شوارع البلد اتّحَدت
ترسم عشقك عاقدة النية
حتى حروف الكلمة الصعبة
كانت تصدح بي حنية
تشتل وعدك في دنياها
وتفضل مخلصة ليك ووفية

* * *

يا متهجّسة في أيامك
بي آلام الوطن الـهـِيّ
بي أطفال في الشارع ضاعوا
ويد تربال مغلوب ملوية
بي أحلام الأمة السكبت
كل رؤاها ضيا وحرية
وفجراً لسع منتظرنو
ووعد الثورة المابي الجيّة

* * *

يا مهمومة بشعبك وناسك
يا مفروشة نضال وقضية
حـقـقي قولك فيني تعالي
وأفتحي كم صفحات مطوية
برغم الريد الفيني مخبّأ
ما بتشابا لريدك ليّ
وماهو قصيد البكتبو عنك
بس مني اعتبريها تحية

ديوان لون المغرب